L-ewwel passi kontra d-diskriminazzjoni fil-post tax-xogħol

Agħraf li jista’ jkun hemm diskriminazzjoni

M’għandek tinjora ebda każ potenzjali ta’ diskriminazzjoni. Każi ta’ din ix-xorta jistgħu jiġu jiswew ħin, flus u inkwiet lil kull min ikun imdaħħal fihom, minbarra l-possibbiltà ta’ riklam ħażin li jistgħu jagħmlu. F’każ legali, il-fatt li ma tkunx ħadt il-passi meħtieġa jista’ jkun interpretat kontrik.

Sir af il-leġislazzjoni l-ġdida

Aċċerta ruħek li int u l-impjegati tiegħek tafu l-elementi prinċipali tal-leġislazzjoni l-ġdida. Toqgħodx tistenna sakemm tinqalagħlek xi problema. Ftakar: int responsabbli għall-azzjonijiet ta’ l-impjegati tiegħek; għalhekk aċċerta ruħek li jafu x’inhu mistenni minnhom.

Oħloq ambjent tajjeb

Ara kif tista’ toħloq post tax-xogħol fejn ikun hemm tassew dinjità u rispett għal nies differenti.

Żviluppa Politika Mhux Diskriminatorja
Agħmilha ċara li d-diskriminazzjoni, il-fastidju u l-vittimizzazzjoni m’humiex aċċettabbli fil-post tax-xogħol. Kun lest li ssegwi din il-politika u tinfurzaha.

Mexxi bl-eżempju

Id-dikjarazzjonijiet u l-imġiba tat-tmexxija ta’ l-organizzazzjoni jgħaddu messaġġ ċar ta’ x’inhu mistenni mill-impjegati fil-post tax-xogħol.

Studja l-organizzazzjoni tiegħek kollha

Studja kull politika, sistema, u prattika ta’ l-organizzazzjoni tiegħek sabiex issir taf fejn jista’ jkun hemm xi diskriminazzjoni. Kun lest li tagħmel il-bidliet meħtieġa biex ittejjeb l-affarijie.

Għid x’qed tagħmel

Għid b’dak li qed tagħmel biex taqta’ d-diskriminazzjoni lill-impjegati, lir-rappreżentanti tagħhom u lill-bqija tal-komunità.

Tejjeb il-ħiliet ta’ l-impjegati

Ħarreġ lill-impjegati biex ikunu jafu x’inhi d-diskriminazzjoni u kif jikkumbattuha. Hemm anqas ċans li l-impjegati jġibu ruħhom b’mod diskriminatorju jekk ikunu mgħallma li għandhom jirrispettaw id-differenzi bejn in-nies.

Investiga l-ilmenti

Waqqaf proċess ċar u indipendenti sabiex l-ilmenti jkunu investigati b’mod trasparenti. Fuq kollox, tivvittimizzax lill-vittma – dan ukoll hu kontra l-liġi!

Ħu Passi Pożittivi

Għandek tqis programmi speċjali li jgħinu lill-impjegati ġejjin minn gruppi li m’humiex rappreżentati biżżejjed biex japplikaw għal impjiegi jew biex jerfgħu responsabbiltajiet ġodda.

Eżamina l-inizjattivi mill-ġdid

L-affarijiet jinbidlu. Każijiet reċenti għandhom mnejn joħolqu preċedent legali. L-ilmenti jistgħu jgħinuk tidentifika kwistjonijiet speċifiċi li għandhom ikunu indirizzati. Kun żgur li dejjem teżamina mill-ġdid dak li tkun qed tagħmel.

Żomm responsabbli lin-nies

Il-kontroll tad-diskriminazzjoni m’hux ir-responsabbiltà ta’ grupp wieħed. Din ir-responsabbiltà għandha tkun parti mill- -inkarigu ta’ l-impjegati kollha. Għinhom jifhmu dak li jistgħu jagħmlu huma stess.

Kejjel il-progress li tagħmel

Iffissa l-miri u fassal il-mod kif tista’ tiġbor it-tagħrif li għandek bżonn biex tkun taf kemm qed tirnexxi l-kampanja tiegħek kontra d-diskriminazzjoni fil-post tax-xogħol.

Ifrex il-kuntatti ma’ min hu interessat
Ifrex il-kuntatti ma’ organizzazzjonijiet esterni li jirrappreżentaw jew jaħdmu ma’ grupp ta’ nies wiesa’ u mżewwaq. Dan iwassal biex tilħaq firxa usa’ ta’ nies jew biex tieħu pariri dwar l-inizjattivi tiegħek.

Fittex l-għajnuna ta’ esperti

Hemm ħafna organizzazzjonijiet u esperti differenti li jistgħu jgħinuk tieħu dawn il-passi. Sir af min fejn tista’ tikseb aktar tagħrif u għajnuna.

Għal aktar informazzjoni dwar x’tista’ tagħmel bħala persuna li timpjega biex ittejjeb il-kumpanija tiegħek f’termini ta’ diversita` u anti-diskriminazzjoni, jekk jogħġbok aqra l-‘Fact Sheets’ tagħna.